Til er ósmekklegur brandari um Alzheimer sjúkdóminn.
Veistu hverjir eru helstu kostirnir við að fá Alzheimer?
Í fyrsta lagi getur maður sagt sama brandarann aftur og aftur án þess að nokkur finni að því.
Í öðru lagi móðgast enginn þó að maður gleymi afmælisdeginum hans.
Í þriðja lagi getur maður sagt sama brandarann aftur og aftur án þess að nokkur finni að því.
Tryggir lesendur Morgunblaðsins hafa tekið eftir því að í ritstjórnargreinum blaðsins hefur afskaplega skemmtileg kímni verið eins og rauður þráður undanfarin þrjú ár. Greinarnar eru ekki skrifaðar undir nafni og því veit enginn hver skrifar þær, nema hve ljóst er að höfundur býr yfir leiftrandi húmor. Ekki njóta allir þessa skemmtilega blaðs og því tók ég saman nokkur dæmi um ákaflega skemmtilega fyndni leiðarahöfundar, sem mætti segja að hafi verið „leiðarastef“ blaðsins undanfarin ár.
Góða brandara þarf ekki að skýra og því birtast þeir hér eins og í blaðinu. Þeir sem ekki skella upp úr hafa augljóslega brenglaða kímnigáfu.
Hefst nú Íslensk fyndni hin nýja:
16. júlí 2020
„Skyndilega rann upp fyrir demókrötum að þeir yrðu að sitja uppi með Joe Biden, sem forystan var búin að afskrifa sem óhæfan. Því þótt flokkurinn hefði færst mjög til vinstri síðustu árin gæti það ekki gengið að hafa samansúrraðan, yfirlýstan vinstrisósíalista sem forsetaefni í Bandaríkjunum. Ekki endilega af hugsjónaástæðum heldur því að þar með yrði brautin breið, slétt og lögð „rauðum“ dregli fyrir Donald Trump.“
„Biden hafði staðið sig slaklega í prófkjörinu og óþægilega oft verið úti á þekju svo aumkunarvert var. Það er ekki bundið við Biden að þegar slíkt ferli er orðið jafn áberandi og í hans tilviki getur það ekki annað en versnað með hverjum mánuði. Úrræðin hafa verið að geyma frambjóðandann ofan í kjallara, þar sem einungis innvígðir nálgast hann og setja honum fyrir talspjöld sem hann á erfitt með að klúðra.“
1. september 2020
„En fréttaskýrendur segja þessar kannanir geta gefið til kynna að baráttan sé ekki búið spil fyrir Trump og repúblikana. En sé þetta í raun upphaf sveiflu í öndverða átt hverjar gætu verið helstu skýringar þess? Fyrsta tilgátan hlyti að vera sú, að mjög áhættusamt var að flagga frambjóðanda sem geyma þurfti í felum ofan í kjallara mánuðum saman og banna öllum aðgang að honum sem eru utan pólitísks safnaðar hans.“
8. september 2020
„Og eftir sigurinn sem kannanir segja nær öruggan er næst að færa karlinn upp úr kjallaranum í Delaware og niður í margra hæða byrgi Hvíta hússins og láta því næst harðsósíalistann Harris um framhaldið ofan jarðar.“
1. október 2020
„Demókratar hafa falið Biden niðri í kjallara í marga mánuði með vísun til kórónuveirunnar. En á sama tíma hefur Trump boðað til fjölda funda sem tugir þúsunda hafa sótt.“
„En á meðan Biden hefur kúrt í kjallaranum hafa stuðningsmenn og áróðursliðar Trumps komið því rækilega á framfæri hvers vegna þetta sé gert. Þeir halda því fram að Biden frambjóðandi hafi óþægilega lengi verið „fjarri því að ganga á öllum“.“
24. október 2020
„Það hefur stundum verið óþægilegt fyrir aðra viðstadda þegar Biden veit ekki hvar hann er staddur þá stundina og jafnvel ekki um hvaða vegtyllu hann er að berjast!
Þótt veiran sé afsökunin þá er feimni út af þessu meginástæða þess að Biden var geymdur ofan í kjallara mánuðum saman á meðan „the mainstream media“ hefur séð um kosningabaráttuna fyrir demókrata af grátlegri óskammfeilni.“
„Trump hafði lengi beðið þess að komast í færi við Biden þar sem hann nyti ekki verndar kjallaraveggjanna og fengi ekki aðeins skriflegar spurningar í hendur heldur svörin líka. Fyrir klaufaskap kom Biden sjálfur upp um þetta þægilega fyrirkomulag.“
„Næsta verkefnið væri að hafa karlinn í kjallaranum og klára svo seinni kappræðurnar, sem ekki væru nærri eins háskalegar og hinar fyrri.“
„Og eftir sigurinn sem kannanir segja nær öruggan er næst að færa karlinn upp úr kjallaranum í Delaware og niður í margra hæða byrgi Hvíta hússins og láta því næst harðsósíalistann Harris um framhaldið ofan jarðar.“
21. nóvember 2020
„Veiran náði aldrei ofan í kjallara til Bidens þar sem hann háði baráttu sína fyrir því að komast aftur í öldungadeildina, eins og hann hafði ítrekað nokkrum sinnum opinberlega síðustu misserin.“
„Það vekur óneitanlega athygli að Biden, sem ýmsir telja þegar kominn með stöðu „komandi forseta“, gefur fjölmiðlamönnum engin færi til að ræða þá stöðu sem upp er komin. Er þá ekki átt við „blaðamannafundi“ þar sem blaðamaðurinn samdi bæði spurningar til Bidens og svörin frá honum, sem einkenndi „kjallaraviðtölin“.“
7. janúar 2021
„Við þetta bætist að aldrei í sögu Bandaríkjanna hefur veikari forseti komið nýr í Hvíta húsið. Hann var, svo sem frægt er, geymdur í kjallaranum heima hjá sér næstum alla kosningabaráttuna, en rækilega studdur af bandaríska fjölmiðlaveldinu sem lét sér nægja að fá sendar spurningar til frambjóðandans frá umsjónarmönnum hans og sitja svo „hugfangnir“ fyrir framan hann þegar Joe las svörin af spjöldum sem ekki var endilega ljóst hvort hann hefði haft nokkuð með að gera!“
5. mars 2021
„Hvað sem þessari umræðu líður þá stóð hvorugur frambjóðendanna sig vel í kappræðunni en sú niðurstaða var mun mikilvægari fyrir Biden. Hann hafði verið geymdur svo lengi í kjallaranum fræga sem gaf margvísleg færi á getgátum.“
„Eftir kappræðuna varð aðeins snúnara að gera sér mat úr meintum andlegum vandræðum frambjóðanda demókrata, sem kjallarageymslan ýtti undir.“
„En sú spurning stóð opin eftir, ef Joe Biden væri ekki eins langt leiddur vegna aldurs og mörg atvik síðustu ára ýttu undir, af hverju var hann þá hafður í kjallaranum í Delaware nær alla kosningabaráttuna?“
„Demókratar komust upp með kjallarameðferðina á Biden og það þótt niðurstaða kappræðna gæti bent kjósendum á að feluleikurinn með frambjóðandann hefði gengið of langt.“
„Og aftur, þegar og ef menn spyrja sig hvort slíkt því líkt gæti gerst í nútímanum, þá má minna á, að öðrum af tveimur frambjóðendum var að mestu komið fyrir ofan í kjallara lungann af kosningabaráttu um embætti valdamesta manns veraldar!“
20. mars 2021
„Biden hlýtur að vera meðvitaður um það, að þeir sem settu mark sitt á söguþráðinn um karlinn í kjallaranum, sem kæmist undan veruleika kosningabaráttu í krafti kóvíð, létu sér ekki það nægja.“
„Karlinn í kjallaranum var aðeins upphafið.“
23. mars 2021
„Joe Biden hefur síðan talið sig hafa haft yfirumsjón með málinu og CNN trúir því. Kannski komið með bóluefnin upp úr kjallaranum eða hrasað um þau annars staðar.“
21. maí 2021
„Joe Biden tilkynnti nýlega með gleðibrag að grímuskyldan væri fyrir bí og það væru mikil tímamót og sigureinkenni. Það má skilja gleði hans sem geymdur var heilt kosningaár ofan í kjallara í Delaware og svo, eftir að hann losnaði þaðan, hafður allar stundir með grímuna, margsprautaður maðurinn.“
8. júní 2021
„Nú, þegar Biden er kominn endanlega upp úr kjallaranum, eins og fyrrnefndur hópur af leynifundi í hótelsalnum úr Sjálfstæðisflokknum, gerir Biden ekkert með sín eigin mótmæli í kosningabaráttunni.“
16. ágúst 2021
„Talíbanar áttuðu sig bersýnilega á þessu og sömuleiðis því að forseti Bandaríkjanna kæmi líklega ekki upp úr kjallaranum til að kanna hvort áætlun hans stæðist eða hvort að hana þyrfti að endurskoða.“
20. ágúst 2021
„Svo miklu betra hefði Biden orðið eftir í kjallaranum góða í Delaware“
21. ágúst 2021
„Mikið hefur verið gantast með að flokknum tókst að halda frambjóðandanum niðri í kjallara í Delaware lungann af kosningabaráttunni.“
„Spurningin er því sú, hvort nú verði snúið við blaðinu eða hvort næsti þáttur kjallararevíunnar verði settur upp í Delaware.“
4. september 2021
„Trump var í framboði gegn mjög snúnum andstæðingi. Hann hét í raun „Ekki Trump“ en birtist á kjörseðlinum undir leikaranafninu Joe Biden. En sá var að öðru leyti hafður í pössun í þægilegum kjallara í Delaware og skipti sér lítt af „Ekki Trump“ sem birtist undir nafninu Joe Biden á kjörseðlinum.“
23. október 2021
„Handlöngurum demókrataflokksins tókst óneitanlega að mestu að komast í gegnum kaflann fyrir kosningar þar sem Biden var hafður í einangrun í kjallaranum í Delaware drýgstan tíma.“
9. nóvember 2021
„Aðeins með öflugum og viljugum fjölmiðlaher landsins gæti það nokkru sinni gengið upp af hafa Biden frambjóðanda faldan niðri í kjallara í Delaware lungann úr kosningabaráttunni.“
23. nóvember 2021
„Brúðustjórnendur Bidens geta ekki sett hann á ný ofan í kjallara í Delaware og tryggt sér sigur.“
„Það mundi ekki einu sinni duga að geyma hann í gluggalausu geymslunni undir kjallaranum í Delaware.“
29. janúar 2022
„Eins verður að telja að minnkandi líkur standi til þess að Trump verði í framboði haustið 2024, þótt stuðningur við hann sé enn mjög mikill í flokki repúblikana. Margt er tínt til, en eitt af því sem hæglega má hafa á móti honum, án þess að ráðast beint á hann, er að hann yrði þá á svipuðu reki og Biden var þegar hann var dreginn upp úr kjallaranum og 20 milljónir atkvæða bættust óvænt við, og flest til Bidens, með nýjum póstatkvæðareglum sem afsakaðar voru, eins og flest, stórt og smátt, með veirunni. Í skjóli hennar var þess lítt gætt að sannreyna kosningarétt manna.“
19. febrúar 2022
„En nú heyrast stundum fagnaðarstunur um að aldrei hafi nokkur forseti í sögu Bandaríkjanna fengið annan eins fjölda atkvæða og Joe Biden fékk. Sá sami sem geymdur var ofan í kjallara, í Delaware, meginhluta bráttunnar.“
„Komið er á daginn, sem er dapurlegt, hver var ástæða þessa sérkennilega fyrirkomulags. Kjallaraafbrigðið með Biden heppnaðist vel og það var lítið verkefni fyrir flokkskerfið að hafa Trump einan í kosningabaráttunni, bæði með og á móti, og gátu sjónvarpsstöðvarnar 5, sem kölluðu ekki allt ömmu sína, nema þá kannski helst Biden, hamast í Trump frá morgni til kvölds, sem var algjörlega hefðbundið verkefni þeirra allt kjörtímabilið.“
„Nú veit hver einasti Bandaríkjamaður sem vill vita, hvers vegna Joe Biden var hafður ofan í kjallaranum í Delaware. Og kjósendur eru búnir að átta sig á því að þeir voru hafðir að fíflum margir hverjir.“
22. febrúar 2022
„Enginn veit hverju hann ætlar að stýra úr kjallara Hvíta hússins, sem hann hefði ekki getað gert úr kjallaranum í Delaware, sem hann þekkir svo vel.“
2. apríl 2022
„Á þessu rúma ári sem liðið er frá því að demókratar misstu Biden upp úr kjallaranum og inn í Hvíta húsið hefur gefist góður tími til að hafa ekki lengur minnstu efasemdir um hæfileika núverandi forseta í þessum (…)efnum.“
2. júlí 2022
„Það ömurlega við Biden-málið er að forsetinn var geymdur drjúgan hluta ofan í kjallara húss síns í Delaware og í þau skipti sem handlangarar hans neyddust til að leyfa einhvern aðgang að honum, þá var reynt að komast upp með að þar væru aðeins fréttamenn frá miðlum sem litu á það sem sitt hlutverk að ganga erinda flokks demókrata í gegnum þykkt og þunnt.“
9. júlí 2022
„Þegar gengið var á Boris Johnson var fullyrt að honum hefði verið sagt fyrir tveimur eða þremur árum að þessi einstaklingur hefði þá fullur, eins og áður sagði, klipið einstaklinga í samkvæmi. Þessi íþróttalýsing hefur að vísu verið sögð um Joe Biden í meira en 40 ár nema að hann gerði þetta ófullur og þess vegna þótti sjálfsagt að gera hann að varaforseta í átta ár og svo forseta, þegar hann var grafinn upp úr kjallaranum.“
23. júlí 2022
„Þykir einhverjum líklegt að Joe Biden, af öllum mönnum, hafi slegið öll met í fjölda atkvæða, þvert á allar kenningar? Frambjóðandinn sem geymdur var í kjallara húss síns lungann af kosningabaráttunni, frambjóðandi sem tilkynnti þúsundum áheyranda á fundi að hann væri í framboði til öldungadeildarinnar, frambjóðandi sem sagði áheyrendum aftur og aftur að hann væri stoltastur af því á sínum ferli að hafa náð að leysa Nelson Mandela úr fangelsi á Robbin-eyju, sem hvorki Mandela né nokkur samstarfsmanna hans né reyndar nokkur annar maður kannast við?“
27. apríl 2023
„Biden er á níræðisaldri og nokkuð er horft til þess, þótt aldurinn ráði ekki úrslitum. Á þessum rúmu tveimur valdaárum hafa bæst við merki þess að atgervi Bidens sé farið að láta á sjá. Í aðdraganda síðustu kosninga var hann löngum geymdur í kjallara heimilis síns í Delaware og var veirufárið notað sem afsökun þess.“
Heimasíða Benedikts Jóhannessonar 