You Really Got a Hold on Me. Bítlalög 36-60.

Hér kemur fyrsti raðaði hlutinn af bestu bítlalögunum mínum. Guðmundur Andri birti sinn lista loksins í morgun, lög 60 til 51 og hverju lagi fylgdi löng ritgerð þannig að mig grunar að hann hafi ætlað að gera listann að bók. Ég veit ekki svona mikið um öll lögin, hvað þá að ég geti sagt hvaða áhrif þau höfðu á samfélagið, þannig að ég fylgi listanum bara úr hlaði með nokkrum orðum.

Núna þegar ég virði listann fyrir mér sé ég að flest lögin á þessum hluta hans eru af fyrstu plötunum. Ég á engar sérstakar minningar um flest þeirra, nema um skemmtilega tíma og oft mikið fjör. Sum lögin heyrði ég ekki mikið fyrr en ég var kominn í menntaskóla, löngu eftir að þau komu út.

Lagið í 60. sæti er svona „guilty pleasure“ lag. Enginn viðurkennir að honum finnist Your Mother Should Know flott, en satt að segja finnst mér öll lögin á Magical Mystery Tour skemmtileg. Tvöföld 45 snúninga plata var líka skemmtileg nýjung, svo ekki sé talað um múnderinguna á hljómsveitarmönnum. Maður las að myndin hefði verið algjör flopp, en lögin eru frábær.

Elstu lögin eru flest miklu einfaldari en þau sem voru á seinni plötunum, en það er einmitt það sem gerir þau skemmtileg og flott. Seinna voru þeir, kannski aðallega Paul, komnir í að semja lög sem áttu að fanga ákveðna stemningu, til dæmis upphafslögin Sgt. Peppers, Magical Mystery Tour og Back in the USSR.